ഒരു തൊഴി....
ഒരു മാന്ത്....
ഒറ്റക്കടി....
കണ്ണിനിട്ടൊരു കൊത്ത്....
വേലി പൊളിച്ച് ഞങ്ങളും വരുമെടാ മനുഷ്യാ, ഒരുനാള്‍! സൂക്ഷിച്ചോ!
നിന്‍റെയൊക്കെ സ്വാതന്ത്ര്യദിനത്തിലും റിപ്പബ്ലിക് ദിനത്തിലുമാണല്ലോ ഇവിടേക്ക് സ്വദേശി വിദേശി സന്ദര്‍ശനം കൂടുന്നത്? ഉപ്പു വാറ്റിയും നിരാഹാരം കിടന്നും പലതും നേടിയതിന്‍റെ വീരസ്യങ്ങള്‍ നീ വിളമ്പാറുണ്ടല്ലോ! സ്വാതന്ത്ര്യത്തിന്‍റെ മഹത്വത്തെപ്പറ്റി കവലയിലും ടെലിവിഷനിലും പാടി നടക്കാറുണ്ടല്ലോ!
ആവാസവ്യവസ്ഥയെക്കുറിച്ചും ജൈവഗണങ്ങളുടെ നിലനില്‍പ്പിനെക്കുറിച്ചും കോടികള്‍ മുടക്കി പഠനം നടത്തുന്നുണ്ടല്ലോ!
കാട്ടാന നിങ്ങളെ ചവിട്ടിക്കൊല്ലുന്നതും നാട്ടാന നിങ്ങളെ കുത്തിക്കൊല്ലുന്നതും മദമിളകിയിട്ടാണെന്നു കരുതിയോ നീ? സമരം തുടങ്ങിയിട്ടേയുള്ളൂ. നീയെന്തറിഞ്ഞെടാ മനുഷ്യാ? നീയെന്തറിഞ്ഞെടീ മനുഷ്യത്തീ?
വേലി പൊളിച്ച് ഞങ്ങളും വരുമെടാ ഒരുനാള്‍! സൂക്ഷിച്ചോ!
